Në Pogradec u zhvillua një aksion i gjerë pastrimi për të përgatitur zonën për sezonin turistik. Në këtë nismë morën pjesë ndërmarrjet e bashkisë, kompani private dhe nxënës të shkollave lokale.
Aksioni filloi nga Qafë Thanë, e cilësuar si porta hyrëse për turistët e huaj. Ai u zhvillua përgjatë aksit rrugor Qafë Thanë–Pogradec dhe u shtri deri në bregun e liqenit të Ohrit.
Kryeministri Edi Rama ndau në rrjetet sociale pamje nga aktiviteti, duke e prezantuar si fazën e parë të pastrimit. Ai theksoi se aksionet do të vazhdojnë me një fazë të dytë, për të siguruar përgatitjen e plotë të zonës për sezonin turistik.
Në postimin e tij, Rama shkroi se kjo është një nismë e përbashkët mes bashkisë, sektorit privat dhe shkollave, për të përmirësuar ambientin dhe për t’iu dhënë mirëseardhje vizitorëve. Ai përdori hashtagun #ShqipëriEPastër për të promovuar iniciativën.