Kryeministri i Shqipërisë, Edi Rama, zhvilloi një takim me Kryeministrin e Holandës, Rob Jetten, gjatë qëndrimit në Tivat të Malit të Zi. Takimi u zhvillua në margjinat e Samitit BE–Ballkani Perëndimor, ku liderët rajonalë dhe përfaqësues të lartë të Bashkimit Europian diskutojnë mbi të ardhmen e procesit të integrimit.
Samiti, i cili pason takimin e mbajtur gjashtë muaj më parë në Bruksel, kryesohet nga Presidenti i Këshillit Europian, António Costa, ndërsa mikpritës i aktivitetit është Presidenti i Malit të Zi, Jakov Milatović. Në punimet e samitit marrin pjesë edhe Presidentja e Komisionit Europian, Ursula von der Leyen, si dhe Përfaqësuesja e Lartë e BE-së për Politikën e Jashtme dhe Sigurinë, Kaja Kallas.
Nën temën “Prosperiteti i Përbashkët dhe Stabiliteti i BE-së dhe Ballkanit Perëndimor”, axhenda e samitit fokusohet në disa shtylla kryesore:
• Forcimi i partneritetit strategjik midis Bashkimit Europian dhe Ballkanit Perëndimor.
• Përshpejtimi i procesit të zgjerimit dhe integrimi gradual i vendeve të rajonit në tregun e përbashkët.
• Zbatimi konkret i Planit të Rritjes për Ballkanin Perëndimor.
Ky takim shihet si një mundësi për të shqyrtuar strategji të reja që ndihmojnë vendet e rajonit drejt anëtarësimit në Bashkimin Europian. Në takimin e delegacionit shqiptar ishte i pranishëm edhe Ministri për Evropën dhe Punët e Jashtme, Ferit Hoxha.