Ramush Haradinaj, kryetar i Aleancës për Ardhmërinë e Kosovës (AAK), ka bërë thirrje për më shumë dashuri, përkrahje dhe trajtim të barabartë ndaj personave me Sindromën Down në kuadër të Ditës Botërore të Sindromës Down.
Përmes një mesazhi publik, Haradinaj e ka cilësuar këtë ditë si të veçantë për njerëzit që reflektojnë dashuri dhe optimizëm në mënyrën e tyre unike.
“Ata meritojnë trajtim të barabartë dhe mbështetje të vazhdueshme për të përmbushur plotësisht potencialin e tyre”, ka deklaruar ai.
Haradinaj ka kërkuar që kujdesi dhe përkrahja ndaj këtyre personave të mos kufizohet vetëm në këtë ditë, por të jetë i përditshëm. “Të kujdesemi dhe t’i përqafojmë me dashuri. Çdo ditë, jo vetëm sot”, ka përfunduar ai.
Kjo ditë botërore synon të rrisë ndërgjegjësimin për të drejtat, përfshirjen dhe mirëqenien e personave me Sindromën Down në shoqëri.