Sipas raportit të fundit mbi barazinë gjinore të Ministrisë së Shëndetësisë, 1 në 9 gra në Shqipëri, ose afro 11%, nuk kanë marrë kujdesin shëndetësor të nevojshëm.
Ekspertët e çështjeve sociale e lidhin këtë fenomen kryesisht me diferencat gjinore dhe pamundësinë financiare. Pedagogia dhe sociologia Eris Dhamo shpjegoi se gratë vuajnë jo vetëm ngarkesën gjinore, por edhe pabarazi ekonomike: kanë më pak akses në të ardhura, kryejnë punë më pak të paguara dhe mbajnë rolin kryesor të përkujdesjes në familje.
Faktor tjetër është transporti dhe mungesa e mjekëve specialistë në zonat rurale, që rrisin kostot për vizita mjekësore, analiza të specializuara dhe largësinë nga qendrat shëndetësore. Dhamo theksoi se gratë, me status jo dominant në shoqëri, kanë nevoja shëndetësore të ngjashme me burrat, por mungon aksesi.
Gratë e moshuara dhe ato në zonat rurale e vuajnë më shumë këtë mungesë. Dhamo sqaroi se një grua e moshuar ka nevojë për më tepër kujdes, por e merr shërbimin vetëm nëse shoqërohet nga dikush, ndërsa në fshatra kontakti me mjekun nuk është i menjëhershëm.
Raporti vë në dukje se përqindja e grave në varfëri është më e lartë se te burrat dhe rritet me moshën.