Një raport policor i datës 27 janar 2025 konstaton se nuk ka elemente të veprës penale në incidentin që përfshiu eskortën e kryeministrit në detyrë Albin Kurti në dalje të Skenderajt.
Raporti i Policisë së Kosovës, i siguruar nga RTK, tregon se rreshteri Gëzim Millaku kishte njoftuar fillimisht se një veturë kishte tentuar të hynte në mes të eskortës. Pas analizës së kamerave të qytetit dhe videoincizimeve, një rreshter tjetër ka deklaruar se vetura ka bërë kyçje të vrullshme, por nuk e ka rrezikuar eskortën dhe nuk ka pasur rrezik të drejtpërdrejtë.
Vozitësi i veturës së dyshuar është identifikuar si Sami Lushtaku, në atë kohë nënkryetar i Komunës së Skenderajt. Ai ka deklaruar se ishte ndalur për të marrë ujë dhe më pas është kyçur në rrugë me kujdes dhe shpejtësi të ulët. Deklarimet e tij përputhen me pamjet e videoincizimeve.
Pas konsultimit me prokuroren e shtetit Ajtene Zoni, raporti përfundimtar ka konstatuar se qarkullimi në atë pjesë të rrugës zhvillohet në dy shirita dhe se nuk ka pasur nevojë për devijim apo frenim nga ana e eskortës. Prandaj, nuk janë gjetur elemente të ndonjë vepre penale apo kundërvajtje kundër sigurisë së trafikut publik.
Lushtaku ka ushtruar padi për shpifje ndaj Kurtit më 20 maj 2026, një ditë pas deklaratave të këtij të fundit në një intervistë televizive.