Kryetari i Skenderajt, Sami Lushtaku, publikoi sot raportin zyrtar të Policisë së Kosovës, duke hedhur poshtë pretendimet e kryeministrit në detyrë, Albin Kurti, se ai kishte tentuar të sulmonte eskortën e tij me veturë në janar të vitit të kaluar. Sipas Lushtakut, ky raport, i cili bazohet edhe në video-incizime, konfirmon se nuk ka pasur as sulm dhe as rrezikim të sigurisë në komunikacion.
Në një reagim përmes rrjeteve sociale, Lushtaku i cilësoi akuzat e kryeministrit si të fabrikuara për përfitime politike, me qëllim njollosjen e figurës së tij publike. Ai deklaroi se për këto pretendime, të cilat i konsideron shpifje, Albin Kurti do të përballet me drejtësinë.
"Raporti thotë qartë se nuk ka pasur as sulm ndaj eskortës dhe as rrezikim të sigurisë në komunikacion. Për këtë gënjeshtër publike, Albin Kurti do të përgjigjet para gjykatës", u shpreh Lushtaku.