Sami Lushtaku, kryetar i Komunës së Skenderajt, u intervistua nga organet e drejtësisë lidhur me një incident të raportuar me Hysni Mehanin, kryetar i degës së Lëvizjes Vetëvendosje në Skenderaj, i cili pretendon se është sulmuar fizikisht nga Lushtaku.
Prokuroria Themelore në Mitrovicë konfirmoi se intervistimi i Sami Lushtakut u krye dhe rasti kaloi në procedurë të rregullt. Hetimet për rastin vazhdojnë.
Para stacionit të policisë në Skenderaj u mblodhën qytetarë të shumtë për ta mbështetur Lushtakun.
Para intervistimit, Sami Lushtaku postoi në Facebook: “Unë i përgjigjem Republikës, kombit dhe Zotit. Si gjithmonë, edhe sot i përgjigjem drejtësisë. I respektoj institucionet për të cilat unë dhe bashkëluftëtarët e mi kemi luftuar dhe kemi dhënë gjithçka. Për dallim nga Albin Kurti, i cili nuk respekton as Policinë e as Prokurorinë, që Kushtetutën e shkel sa herë i konvenon politikisht, unë i respektoj dhe ju përgjigjem gjithmonë institucioneve të Republikës. Bëj thirrje për qetësi dhe maturi ndërsa shpresoj që Prokuroria të mos instrumentalizohet, por ta kryejë punën e vet në mënyrë të pavarur, pa ndikime dhe pa presion!”.