Nënkryetarja e PDK-së, Vlora Çitaku, ka reaguar pas intervistimit të kryetarit të Skenderajt, Sami Lushtaku, nga Prokuroria. Në një postim në Facebook, ajo ka krahasuar qëndrimin e kryeministrit në detyrë Albin Kurti me atë të Lushtakut.
Çitaku ka thënë se Kurti jo vetëm që refuzon t’i përgjigjet Prokurorisë, por e sfidon publikisht që t’i shkojë në zyrë për ta intervistuar lidhur me një aferë korruptive multimilionëshe. Ajo ka shtuar se mosrespektimi i Kushtetutës dhe ligjeve nuk është trimëri, por shenjë e frikës dhe arrogancës së pushtetit.
Ndërkaq, Çitaku ka vlerësuar faktin që Lushtaku ka shkuar në Prokurori. Ajo ka theksuar se kryetari i Skenderajt e respekton shtetin për të cilin ka luftuar dhe se dallimi mes dy qëndrimeve është i qartë.
Postimi i Çitakut vjen pas intervistimit të Lushtakut lidhur me incidentin e ndodhur të enjten në komunën e Skenderajt.