Prej 5 muajsh, që kur Lista Serbe ka rimarrë udhëheqjen e komunës në Mitrovicën e Veriut, është vërejtur një proces i largimit të punonjësve shqiptarë nga pozicionet e tyre në institucionet publike, duke përfshirë zyrën e komuniteteve, sallën e sporteve dhe institucionet shëndetësore.
Asamblisti i Partisë Demokratike të Kosovës (PDK) në këtë komunë, Emin Azemi, ka deklaruar se arsyetimet kryesore të dhëna për largimet janë mospërmbushja e detyrave ose e kritereve të punës. Ai theksoi se njohja e gjuhës serbe nuk është kusht ligjor për këta punonjës, duke shprehur shqetësimin mbi trajtimin e personelit shqiptar në një mjedis ku shumica e stafit është serbe. Azemi u ka bërë thirrje të gjithë atyre që ndihen të kërcënuar apo të diskriminuar që të ndërmarrin veprime ligjore dhe të procedojnë penalisht rastet e presionit.
Nënkryesuesja e Kuvendit Komunal, Aida Ferati-Doli, ka konfirmuar se ka pasur raste kur punonjësit janë rikthyer në detyrë pas ankesave. Ajo mori si shembull rastin e një motre medicinale në Kodrën e Minatorëve, e cila u shkarkua me pretekstin e performancës, por u kthye në vendin e saj të punës pasi Këshilli konstatoi shkelje të ligjit në procesin e largimit.
Nga ana tjetër, ish-nënkryesuesi i Kuvendit Komunal, Skënder Sadiku, sugjeroi se këto zhvillime mund të jenë të ndikuara edhe nga dinamikat e fushatës zgjedhore. Ai apeloi tek partitë politike që të ruajnë dinjitetin e qytetarëve dhe vendet e tyre të punës, ndërsa ftoi të gjithë personat që përballen me probleme të tilla t'u drejtohen organeve të drejtësisë.