Ministri për Komunitete dhe Kthim, Nenad Rashiqi, ka biseduar me kryeministrin e Kosovës, Albin Kurti, në lidhje me deklaratën e tij për 24 hektarë tokë të Manastirit të Deçanit. Biseda u zhvillua nëpërmjet telefonit mbrëmë.
Rashiqi shpjegoi se, pas verifikimit të deklaratës së tij, i tha kryeministrit se ndoshta kishte bërë një gabim duke ngatërruar një fjalë me një tjetër. Ai e cilësoi këtë komunikim si normal.
Sipas tij, është normale të gabosh, pasi gabimet ndodhin. Rashiqi e përshkroi veten si person që nuk gabon shpesh dhe zakonisht është i kujdesshëm me deklaratat që jep. Megjithatë, theksoi se nganjëherë ndodhin gjëra të çuditshme me tru.
"Fiksohet një koncept në kokë dhe kur vjen koha pas tre vitesh që të tregoni saktë çka ka ndodhur në atë moment, nuk është e lehtë të qëlloni çdo element dhe detaj të vogël të proceseve. Në veçanti këto tre vitet e fundit, që konsideroj se kemi punuar me intensitet të lartë. Kështu që këto ndodhin", tha Rashiqi në emisionin T7.