Gjatë një takimi me përfaqësues të shoqatave të biznesit, Kryeinspektori i Përgjithshëm Dashnor Sula prezantoi ndryshimet në sistemin e inspektimeve. Reforma synon rritjen e transparencës dhe garantimin e një marrëdhënieje më korrekte mes institucioneve dhe sipërmarrësve. Një nga masat kryesore është pajisja e detyrueshme e çdo inspektori me kamera inteligjente gjatë ushtrimit të detyrës, si një porosi e kryeministrit për dokumentimin e procesit të kontrollit.
Sipas Sulës, inspektimet nuk do të përcaktohen më në mënyrë subjektive nga inspektori në terren, por do të drejtohen nga një sistem i ri i dixhitalizuar i bazuar në risk. Gjithashtu, u vendos që asnjë inspektim nuk do të kryhet pa njoftuar më parë biznesin, duke u dhënë atyre mundësinë për vetëkorrigjim. Për më tepër, inspektorët do të kenë një veshje të unifikuar dhe të identifikueshme që në momentin e nisjes për në punë.
Institucioni ka ngritur një portal të posaçëm ku qytetarët dhe bizneset mund të denoncojnë rastet e abuzimeve, të cilat do të shqyrtohen nga një komision i posaçëm. Sula bëri me dije se brenda një muaji janë trajtuar 55 raportime. Kryeinspektori theksoi se këto ndryshime bëhen për t'u shërbyer qytetarëve dhe për të shmangur trajtimin e biznesit si palë kundërshtare.