Rei Manaj kërkon largimin nga Al Sharjah në Emiratet e Bashkuara Arabe dhe vazhdon bisedimet për kthimin në kampionatin turk.
Mediat turke bëjnë të ditur se presidenti i Sivaspor-it, Burak Ozçoban, ka kontaktuar me të në ditën e fundit, duke paraqitur kushtet financiare për rikthimin në klubin e kategorisë së dytë turke, kandidat për t’u kthyer në elitë.
Sivaspor përballet me bllokim merkato nga FIFA për detyrime financiare, por klubi po punon për shlyerjen e tyre dhe për përfshirjen e menjëhershme të Manaj-it, nëse sulmuesi bie dakord. Ai nuk ka dhënë përgjigje përfundimtare për shkak të këtyre problemeve, por pritet ta bëjë shpejt.
Manaj ka luajtur më parë me Sivaspor-in në Superligë, ku shënoi 30 gola në 60 ndeshje gjatë dy sezoneve, dhe kjo përvojë duket se e tërheq futbollistin e Kombëtares shqiptare.