Pikat e kalimit kufitar të qarkut të Kukësit kanë regjistruar një rekord lëvizjesh ndërkufitare gjatë dy muajve të fundit. Sipas të dhënave zyrtare të bëra të ditura nga drejtori i Drejtorisë Vendore për Kufirin dhe Migracionin Kukës, Arben Alika, gjatë periudhës maj-qershor 2026 janë përpunuar 2 569 414 shtetas dhe 1 303 496 automjete.
Mesatarja ditore për këtë periudhë ishte 42 122 shtetas dhe 21 369 automjete. Fluksi maksimal i regjistruar brenda një harku kohor prej 24 orësh arriti në 74 247 shtetas dhe 28 959 automjete. Për të përballuar këtë volum të shtuar, autoritetet kanë rritur kapacitetet operacionale, duke përfshirë hapjen e dy posteve të reja pune në Pikën e Kalimit Kufitar Morinë.
Përmirësimi i kapaciteteve dhe siguria
Në pikat kufitare po instalohen sisteme të reja teknologjike për të përshpejtuar procedurat dhe për të rritur standardet e sigurisë. Arben Alika bëri të ditur se një vëmendje e veçantë po i kushtohet edhe sigurisë në hapësirat liqenore dhe lumore të qarkut.
Për monitorimin e zbatimit të rregullave nga subjektet që operojnë me mjete lundruese janë angazhuar 57 punonjës policie. Kontrollet po zhvillohen në mënyrë të vazhdueshme përmes patrullimeve tokësore dhe përdorimit të mjeteve ajrore pa pilot (dronë), për të garantuar mbarëvajtjen e sezonit turistik.