Policia e Shtetit dhe forcat e RENEA-s kanë zhvilluar kontrolle të shumta në Mirditë që në orët e para të mëngjesit të së premtes, 15 maj 2026. Aksioni u nis pas informacioneve se Elson Reçi, i shpallur në kërkim nga Prokuroria e Posaçme kundër Korrupsionit dhe Krimit të Rëndë të Organizuar (SPAK) që më 15 maj 2024, mund të kishte hyrë në territorin shqiptar.
Forcat policore ushtruan kontrolle në banesën e Reçit në Mirditë, si dhe në disa ambiente të tjera, por pa gjetur gjurmë të të kërkuarit. Verifikimet pasuese konfirmuan se në Shqipëri kishte hyrë vëllai i tij dhe jo vetë Elson Reçi.
Elson Reçi akuzohet nga SPAK se ka siguruar kushtet dhe mjetet materiale për vrasjen e Preng Gjinit, një krim i konsideruar si hakmarrje për ekzekutimin e xhaxhait të tij, Kastriot Reçi. Ky i fundit u vra me snajper në Rrëshen më 7 janar 2020.
Me vendimin e Gjyqit të Posaçëm Kundër Korrupsionit dhe Krimit të Organizuar (GJKKO) të datës 15.05.2024, Reçit iu caktua masa e sigurimit "arrest në burg" për veprat penale:
- "vrasje për gjakmarrje" e mbetur në tentativë;
- "sigurimi i kushteve dhe mjeteve materiale për të kryer vrasje";
- "mbajtja pa leje dhe prodhimi i armëve, armëve shpërthyese dhe municionit";
- "kultivimi i bimëve narkotike".
Këto vepra të kryera në formë të veçantë të bashkëpunimit, atë të grupit të strukturuar kriminal, "grup i strukturuar kriminal" dhe "pjesëmarrja në grup të strukturuar kriminal".