Operacioni i zhvilluar nga Prokuroria Speciale e Republikës së Kosovës dhe Drejtoria e Hetimeve për Krime Lufte çoi në arrestimin e pesë shtetasve të nacionalitetit serb, të cilët dyshohen për krime lufte kundër popullsisë civile në fshatin Reçak, më 15 janar 1999. Prokurori special Ilir Morina njoftoi se arrestimet janë rezultat i hetimeve të vazhdueshme të zhvilluara në gjashtë muajt e fundit, pas ngritjes së aktakuzës së parë për këtë rast në dhjetor të vitit të kaluar.
Sipas autoriteteve, të dyshuarit ishin pjesë e njësive të posaçme të Policisë së Serbisë gjatë periudhës së luftës. Gjatë bastisjeve në pronat e të arrestuarve, hetuesit kanë konfiskuar prova materiale, duke përfshirë uniforma ushtarake dhe policore, armë, pranga dhe dokumente identifikimi të forcave serbe të asaj kohe. Identifikimi i të dyshuarve është bërë pjesërisht përmes analizimit të video-incizimeve.
Të arrestuarit janë:
• N.P., i lindur më 1968 në Shtërpcë, ish-pjesëtar i MPB-së së Serbisë.
• S.J., i lindur më 1967 në Betollush, ish-polic.
• B.P., i lindur më 1969 në Serqe, ish-polic (i arrestuar në pikëkalimin kufitar të Merdares).
• S.M., i lindur më 1968 në Shtërpcë, ish-pjesëtar i MPB-së së Serbisë.
• S.S., i lindur më 1966 në Gjilan, punëtor në shërbimet postare në Serbi dhe pjesë e formacioneve policore gjatë kohës së luftës.
Në lidhje me këtë aksion, Lista Serbe ka reaguar duke vlerësuar se arrestimet përbëjnë presion politik dhe krijojnë pasiguri për komunitetin serb në Shtërpcë dhe Gjilan. Prokuroria ka bërë të ditur se hetimet vazhdojnë, pasi ka pasur edhe kërkime për një tjetër të dyshuar që nuk është gjetur në vendbanimin e tij gjatë operacionit.