Në mbledhjen e qeverisë, kryeministri në detyrë, Albin Kurti, vlerësoi punën e institucioneve të sigurisë për arrestimin e pesë ish-pjesëtarëve të Polisisë së Serbisë, të dyshuar për përfshirje në Masakrën e Reçakut. Arrestimet, të realizuara më 14 qershor, pasuan një hetim të detajuar që zgjati gjashtë muaj.
Kurti theksoi mangësitë e së kaluarës, duke u shprehur se deri në vitin 2020 nuk kishte pasur përpjekje institucionale për ndjekjen penale të përgjegjësve për këtë rast. Sipas tij, nga mijëra lëndë të trashëguara nga EULEX-i, asnjëra nuk i përkiste hetimeve për masakrën e Reçakut, duke e cilësuar këtë si më shumë se dy dekada dështim në drejtësi.
Kryeministri në detyrë paralajmëroi se koha është faktor sfidues për drejtësinë, pasi shumë dëshmitarë po plaken ose kanë ndërruar jetë. Për këtë arsye, ai kërkoi që hetimet dhe proceset gjyqësore për krimet e kryera gjatë luftës të marrin një ritëm më të shpejtë për të siguruar vendosjen e drejtësisë.