Për dekada me radhë, pushteti në Iran ka qenë i centralizuar në duart e udhëheqësit suprem Ajatollah Ali Khamenei. Pas vrasjes së tij më 28 shkurt gjatë fillimit të luftës me SHBA-në dhe Izraelin, procesi i vendimmarrjes në Teheran është bërë më i decentralizuar, thonë ekspertët.
Mojtaba Khamenei, 56 vjeç, e mori postin e udhëheqësit suprem në fillim të marsit. Ai nuk është parë në publik që nga emërimi i tij më 8 mars, pasi u plagos rëndë në sulmin ajror që vrau të atin. Më 8 maj shefi i protokollit në Zyrën e Udhëheqësit Suprem, Mazahar Hosseini, njoftoi se gjendja shëndetësore e tij është e mirë. Shërbimet e inteligjencës amerikane besojnë se ai luan rol të rëndësishëm në strategjinë e luftës.
Në mungesë të tij, një grup zyrtarësh të lartë iranianë kanë marrë drejtimin e vendit. Gardat Revolucionare Islamike (IRGC) janë bërë tani forca vendimtare politike. Reformistët dhe të moderuarit janë larguar nga skena, duke krijuar një sistem më të ashpër ideologjikisht. Disa vëzhgues e quajnë këtë periudhë "Republika Islamike 3.0". Edhe pse figurat kryesore pajtohen për politikat bazë, kanë filluar të shfaqen disa ndarje mes tyre.