Protestat në Shqipëri, të emërtuara nga qytetarët si Revolucioni Flamingo, kanë hyrë në javën e tyre të dytë. Lëvizja nisi pas incidenteve në Zvërnec, ku një qytetar u dhunua nga policia private teksa protestonte kundër projektit për ndërtimin e një resorti luksoz nga Jared Kushner dhe Ivanka Trump.
Pas protestës së 31 majit përpara Drejtorisë së Policisë së Tiranës, ku u denoncua mungesa e ndërhyrjes së Policisë së Shtetit, kauza mjedisore u zgjerua duke përfshirë pakënaqësi ndaj korrupsionit, varfërisë, shpopullimit dhe arrogancës qeverisëse. Organizimi po kryhet përmes shoqërisë civile dhe rrjeteve sociale, pa mbështetjen e partive politike.
Protestuesit kërkojnë pezullimin e projekteve të ndërtimit në Zvërnec e Sazan dhe dorëheqjen e qeverisë. Nga ana tjetër, Kryeministri Edi Rama ka përjashtuar mundësinë e dorëheqjes ose pezullimit të projekteve, duke argumentuar se qeveria ka marrë votëbesimin e qytetarëve në zgjedhjet parlamentare të zhvilluara një vit më parë. Iliriana Gjoni, nga qendra kërkimore Carnegie Europe në Bruksel, vlerëson se momenti i protestave është i rëndësishëm në kontekstin e debateve aktuale politike dhe shoqërore në vend.