Evropa po hyn në dimër me rezervat e gazit natyror në nivelin më të ulët që nga viti 2013, duke u ekspozuar më shumë ndaj ndërprerjeve të furnizimit dhe duke rritur mundësinë e presionit mbi tregjet ndërkombëtare të energjisë deri në vitin 2027. Paralajmërimin e bëri të martën Agjencia Ndërkombëtare e Energjisë (IEA). Në fund të tetorit, magazinat evropiane ishin rreth 75 për qind të mbushura, nën objektivin minimal prej 80 për qind të Bashkimit Evropian.
Sipas IEA-së, niveli i ulët lidhet me furnizimet e ndërprera, blerjet e vonuara dhe ritmin më të ngadaltë të rimbushjes pas sezonit të mëparshëm të ngrohjes. Vendet evropiane e nisën sezonin e mbushjes me rezerva relativisht të ulëta, pasi periudha e ngrohjes dimërore përfundoi në pranverë. Blerësit i shtynë fillimisht blerjet, duke pritur çmime më të ulëta. Furnizimet u shtuan në gusht, shtator dhe tetor, por jo aq sa për të kompensuar mungesën e krijuar më herët, tha IEA. Gazi i injektuar gjatë sezonit ishte rreth 4 për qind më pak se mesatarja e pesë viteve të mëparshme.
Përpjekjet për të siguruar furnizime shtesë u vështirësuan nga dëmtimi i një impianti të lëngëzimit të gazit natyror në Gjirin Persik gjatë luftës së SHBA-së kundër Iranit dhe nga tranziti i reduktuar përmes Ngushticës së Hormuzit.
IEA paralajmëroi se rezervat e ulëta i bëjnë vendet evropiane më të varura nga furnizimet shtesë të gazit natyror të lëngshëm (LNG) për të përballuar kërkesën maksimale dimërore. Rreziku mund të shtohet nëse temperaturat bien nën mesataret sezonale, nëse shfaqen probleme teknike në rrjetet e gazit ose nëse ndodhin ndërprerje të tjera të furnizimit.
Gjermania, ekonomia më e madhe e Evropës, tha të hënën se pret të ketë gaz të mjaftueshëm për dimrin, megjithëse nuk e arriti objektivin kombëtar të magazinimit. Magazinat e saj ishin mesatarisht 61 për qind të mbushura, sipas agjencisë federale që mbikëqyr infrastrukturën dhe tregjet e energjisë. Kjo ishte nën objektivin ligjor prej 70 për qind, që duhej arritur deri më 1 nëntor, dhe nën mesataren e BE-së, e cila ishte afër 75 për qind.