Prokuroria e Tiranës ka njoftuar rihapjen e çështjes së vrasjes së Kozeta Hysenit, ngjarje e ndodhur në vitin 1999, e cila mbetet ndër krimet më të rënda të pazbardhura në vend. Autoritetet u kanë kërkuar strukturave të policisë vendore të kryejnë verifikime dhe të marrin në pyetje 28 persona që mund të ofrojnë të dhëna të reja për zbardhjen e së vërtetës.
Ndër personat që janë thirrur për të dhënë dëshmi përfshihen dy oficerë policie që kishin drejtuar hetimet fillestare, familjarë të shtetasit Agim Karafili, i cili rezulton të jetë vrarë vite më vonë, si dhe shtetas të tjerë si Dritan Gjika dhe Indrit Dule. Ky i fundit, gjatë dëshmisë së dhënë në kohën e krimit, kishte deklaruar se mbrëmjen e 19 shkurtit 1999 ndodhej për vizitë tek e fejuara e tij.
Një pjesë thelbësore e hetimeve të rihapura përfshin gjithashtu rimarrjen e dëshmive të tre shoqeve të dhomës së viktimës: Mirela Metaj, Valbona Kasaj dhe Kozeta Bushi. Kozeta Hyseni, vajza e një prokurori nga Vlora, u gjet e pajetë në afërsi të kinoklubit të Qytetit Studenti, pasi ishte larguar nga konvikti pas një thirrjeje nga persona ende të paidentifikuar.
Edhe pse çështja ka kaluar nëpër procese të shumta hetimore ndër vite, deri më tani asnjë person nuk është akuzuar apo dënuar për këtë vrasje. Rihapja e dosjes synon të hedhë dritë mbi rrethanat e ngjarjes dhe të verifikojë elemente të mëparshme të hetimit që nuk çuan në rezultate konkrete.