Anuela Ristani, kryetare e komanduar e Bashkisë së Tiranës, zhvilloi një inspektim në zonën e Tregut Çam në Tiranë, më 6 maj 2026. Ajo ndoqi nga afër punimet për transformimin e infrastrukturës publike dhe shërbimeve për banorët dhe bizneset.
Zona do të marrë një identitet të ri estetik dhe funksional. Do të realizohet rehabilitimi i fasadave të pallateve dhe bizneseve me stil neoklasik, reklama të unifikuara dhe ndriçim dekorativ.
Ristani theksoi se, pavarësisht pozicionit qendror në kryeqytet, zona ka vuajtur nga mungesat infrastrukturore për shkak të rrjetit të amortizuar dhe rritjes së kërkesave për shërbime. Një problem kryesor, ai i kanalizimeve të ujërave të zeza, tashmë është zgjidhur përfundimisht.
"Jemi në një zonë shumë qendrore të Tiranës, por për hir të së vërtetës një zonë që ka pasur mungesa të shumta infrastrukture, qoftë nga infrastruktura e vjetër, qoftë nga ajo që është shtuar rishtazi, si pasojë të nevojës për shërbime. Kjo zonë u shërben qindra personave çdo ditë, për shkak të shërbimeve dhe pozicionimit të saj", deklaroi ajo.
Ristani apeloi për mirëkuptim dhe bashkëpunim nga qytetarët dhe sipërmarrësit, duke theksuar se përfundimi i projektit do të sjellë një standard më të lartë jetese. "Ky është një nga projektet me më shumë negociata dhe diskutime, sepse prek banorët, bizneset dhe shërbimet në një qytet të madh", shtoi ajo.