Bashkia e Tiranës ka përfunduar rikonstruksionin e rrugës Ramazan Shushku në zonën e Shkozës, Njësi Administrative nr. 1, afër Unazës së Madhe.
Gjatë inspektimit në terren, Anuela Ristani, kryetare e komanduar e Bashkisë së Tiranës, deklaroi se punimet kanë avancuar shpejt për shkak të shmangies së shpronësimeve.
Ajo theksoi se zona, e cila më parë mungonte çdo lloj infrastrukture urbane ose publike, tani ka standarde të plota dhe lidhet drejtpërdrejt me Unazën e Madhe. Rruga do të vijojë të integrohet me rrugën Pjetër Arbnori, ku Bashkia planifikon investime të mëtejshme. Ristani apeloi për bashkëpunimin e banorëve në mirëmbajtjen e investimit dhe forcimin e jetës në komunitet.
"Kjo është një ndër ato rrugë në të cilat për shkak të shmangies së shpronësimit ka ecur me të vërtetë shumë shpejt. Bëhet fjalë për një zonë e cila nuk ka pasur asnjë lloj infrastrukture urbane apo publike dhe jo vetëm që tani e ka, por është e lidhur edhe me Unazën e Madhe dhe do të vijojë të lidhet me rrugën 'Pjetër Arbnori' të cilën ne do të vazhdojmë ta investojmë. Më në fund kanë të njëjtën infrastrukturë që ka çdo banor i qytetit të Tiranës edhe pse është goxha distancë nga qendra. Mirëpresim bashkëpunimin e banorëve për sa i përket të gjithë investimit, mirëmbajtjes së tij, por edhe të jetës në komunitet e cila e bën edhe investimin edhe më me kuptim", u shpreh Ristani.
Trëndelina Jaku, administratore e Njësisë Administrative nr. 1, konfirmoi kënaqësinë e banorëve. "Banorët kanë qenë të gjithë shumë të kënaqur sepse normalisht s’ka patur problematika. Domethënë normalisht ndriçimi është bërë, ujërat e zeza dhe kanalizimi është bërë, kështu që shumë faleminderit", tha ajo.
Rruga dytësore fillon nga Unaza e Madhe dhe arrin deri në kryqëzimin me rrugët Pjetër Budi dhe Agush Gjergjevica. Ajo shërben si akses për objektet e zonës, kryesisht banesa me 1 deri 3 kate, dhe lidhet në fund me lagjen Çollak. Investimi përfshin ndërtimin e rrjetit të ri të ujërave të zeza, kanalizimeve të ujërave të shiut, shtresave rrugore, trotuareve, ndriçimit modern dhe sinjalistikës.