Kodra e Currilave, e shtrirë në pjesën veriperëndimore të qytetit të Durrësit, mbetet një zonë e rrezikuar nga rrëshqitjet e dheut. Pas një periudhe të gjatë thatësire, reshjet e fundit kanë shtuar shqetësimet e banorëve që jetojnë në pallatet buzë detit. Rrëshqitjet janë intensifikuar katër muaj më parë, kur një mur mbrojtës prej betoni u dëmtua dhe pishat u shkulën, duke rënë mbi katet e para të ndërtesave.
Specialistët shpjegojnë se kodra përbëhet nga formacione sedimentare të alternuara argjilore dhe ranore. Profesor Adem Hyseni, i cili e monitoron këtë zonë prej vitit 1974, vë në dukje se këto shkëmbinj filtrojnë ujin në shkallë të ndryshme, çka dobëson strukturat dhe favorizon rrëshqitjet. Sipas tij, studimet sizmike që nga vitet '80 kanë konfirmuar paqëndrueshmërinë e terrenit deri në territorin e Kallmit.
Në lidhje me situatën, Bashkia e Durrësit ka përgatitur një akt-ekspertizë dhe vlerësim të aftësisë mbajtëse strukturore për objektet e dëmtuara. Megjithatë, nisja e punimeve mbetet e varur nga miratimi i ministrive të linjës dhe alokimi i fondeve nga qeveria. Një përpjekje e mëparshme për rehabilitim në vitin 2014, që përfshinte vendosjen e rrjetave mbrojtëse, nuk rezultoi e suksesshme.
Banorët, ndër të cilët edhe Neritan Vila, theksojnë se zgjidhjet e ofruara më parë, si strehimi i përkohshëm në shtëpinë e pushimit të Ministrisë së Brendshme, nuk kanë qenë afatgjata. Aktualisht, në një nga pallatet më të rrezikuara me 40 apartamente, banojnë rregullisht gjatë vitit vetëm 15-16 familje, ndërsa të tjerët i përdorin për qëllime pushimi ose si investime.