Ky artikull është përditësuar. Shiko përditësimet
Një rrëshqitje dherash ka ndodhur sot, më 7 janar 2026, në aksin rrugor Qukës-Qafë Plloçë, ku një masiv dherash ka rënë mbi një automjet që po kalonte në zonë. Nga ngjarja nuk ka pasur të lënduar, ndërsa automjeti ka pësuar dëme materiale vetëm në pjesën e përparme. Autoritetet po kryejnë punime për pastrimin e zonës dhe rikthimin e qarkullimit normal.
Kjo është ngjarja e dytë e tillë brenda rreth një muaji në këtë aks. Në nëntor 2024, një rrëshqitje masive e dheut dhe shkëmbinjsh u regjistrua pranë tuneleve, si pasojë e shirave të dendur. Atëherë, rruga u bllokua plotësisht, duke vështirësuar qarkullimin e mjeteve, dhe kompania kontraktore vendosi një rreth-pasje provizore për të lehtësuar kalimin.
Rruga Qukës-Qafë Plloçë, që shmang Prrenjasin, Qafë-Thanën dhe Pogradecin, u inaugurua në shtator nga ministrja Belinda Balluku, e cila tani është pezulluar nga detyra dhe ndodhet nën hetim nga SPAK për disa vepra penale. Aksi, me një kosto prej 260 milionë eurosh, u përfundua pas 14 vitesh punimesh. Pas vetëm disa muajsh përdorimi, shembjet masive kanë nxjerrë në pah cilësinë e dobët të punimeve dhe mungesën e studimeve gjeologjike të plota në terren.
Përditësim -
Rruga Qukës-Qafë Plloçë vazhdon të jetë e bllokuar për qarkullimin e mjeteve që nga dje. Gjatë natës kanë ndodhur rrëshqitje të tjera toke dhe reshje bore. Mjetet po kalojnë përmes rrugës së vjetër Qafë-Thanë. Drejtuesi i automjetit të prekur nga rrëshqitja dje rrezikoi jetën menjëherë pas daljes nga tuneli, por shpëtoi pa lëndime të rënda. Report TV ka publikuar video që tregojnë bllokimin dhe reshjet e borës.