Reshjet e dendura të shiut kanë shkaktuar rrëshqitje masive gurësh në rrugën nacionale Burrel-Skuraj, në afërsi të sektorit C. Gurët kanë rënë nga shpati i malit dhe kanë bllokuar një krah të rrugës për disa orë, duke rrezikuar qarkullimin e automjeteve.
Punonjësit e firmës së mirëmbajtjes po punojnë për pastrimin e inerteve që kanë përfunduar në asfalt. Ky segment rrugor përballet shpesh me rrëshqitje gurësh sa herë bie shi i madh.
Policia u bëri apel drejtuesve të mjeteve të tregojnë kujdes të shtuar gjatë kalimit në këtë zonë. Përveç rrëshqitjeve, problemi vazhdon edhe për shkak të mungesës së sinjalistikës rrugore dhe mbrojtëseve anësore.
Gjendja e amortizuar e rrugës me gropa të shumta e bën qarkullimin edhe më të rrezikshëm. Drejtuesit e mjeteve paralajmërojnë se një devijim i vogël për të shmangur gurët mund të përfundojë në liqenin e Shkopetit.