Prej më shumë se 30 orësh, rreth 700 shtëpi në Podujevë kanë mbetur pa furnizim me ujë të pijshëm. Bëhet fjalë për banorët e lagjeve afër hekurudhës, në vendin e njohur si “Çeshmja e Azemit”, si dhe një pjesë të rrugës “Lordi Bajron”.
Këto zona furnizohen nga gypi i vjetër i ujit të pijshëm, i cili vjen nga fabrika e ujit në Shajkovc. Ndalja e furnizimit është bërë pikërisht në këtë linjë.
Banorët kanë protestuar pranë zyrave të Ujësjellësit Rajonal “Prishtina”, njësia në Podujevë. Sipas tyre, zyrtarët nuk kanë dhënë asnjë përgjigje apo sqarim për ndërprerjen.
Ata kërkojnë zgjidhje urgjente dhe informim zyrtar për arsyen si dhe kohëzgjatjen e situatës. Në përpjekje për sqarime, RTK ka kontaktuar njësinë e KRU “Prishtina” në Podujevë, por përfaqësuesit nuk kanë qenë të qasshëm.