Ministrja në detyrë e Ekonomisë, Artane Rizvanolli, njoftoi se është planifikuar një investim kapital prej mbi 2.2 milionë euro për përmirësimin e furnizimit me ujë të pijshëm në Podujevë dhe zgjerimin e rrjetit në zonat rurale. Ky projekt realizohet në bashkëpunim me KRU “Prishtina”.
Sipas njoftimit, Ministria e Ekonomisë ka ndarë 1.22 milionë euro, ndërsa KRU “Prishtina” do të kontribuojë me mbi 1 milion euro shtesë. Investimi parasheh ndërtimin dhe zgjatjen e linjave të reja të ujësjellësit, përmirësimin e presionit në rrjet, reduktimin e humbjeve teknike dhe rritjen e cilësisë së furnizimit për qytetarët.
Nga ky investim do të përfitojnë rreth 27.500 banorë të një pjese të qytetit të Podujevës dhe të fshatrave:
- Llapashticë
- Katunishtë
- Gllamnik
- Dumosh
- Sfeçël
- Livadicë
- Ballovc
- Lladovc
- Surkish
KRU “Prishtina” theksoi se ky angazhim është pjesë e strategjisë për avancimin e infrastrukturës ujore dhe ofrimin e shërbimeve më cilësore për konsumatorët në këtë rajon.