Ministria e Ekonomisë ka nënshkruar një marrëveshje financiare me vlerë 300 mijë euro për zbatimin e dy projekteve në sektorin e ujësjellësit në Komunën e Gjakovës. Ky investim synon forcimin e rrjetit të furnizimit me ujë të pijshëm dhe rritjen e cilësisë së shërbimeve për banorët.
Sipas njoftimit zyrtar, punimet do të përqendrohen në zgjerimin dhe rehabilitimin e infrastrukturës në gjashtë fshatra: Lugbunar, Osek-Hylë, Skivjan, Dol, Lipovec dhe Gërçinë. Gjithashtu, fondet do të mbështesin realizimin e projektit të njohur si “Gjakova III”.
Kryeshefi Ekzekutiv i K.R.U. Gjakova, Hasan Krasniqi, e ka mirëpritur këtë mbështetje financiare. Ai theksoi se këto ndërhyrje do të mundësojnë një furnizim më të qëndrueshëm me ujë të pijshëm, uljen e humbjeve në rrjet dhe përmirësimin e shërbimeve për qytetarët e zonave përfituese.