Qytetarët e komunave veriore të Kosovës pritet të fillojnë të paguajnë faturat mujore për shpenzimin e ujit pas dy dekadash e gjysmë mungese të këtij faturimi. Ky projekt, i cili has vështirësi për shkak të mungesës së adresave dhe problemeve të tjera komunale, synon të zbatohet në mars ose prill të vitit 2026.
Kompania Rajonale e Ujësjellësit "Mitrovica" po kryen përgatitjet e nevojshme për nisjen e faturimit. Sipas Bashkim Kurtit, kryeshefit të kësaj kompanie, po zhvillohet procesi i rekrutimit të stafit. "Jemi në proces të rekrutimit të stafit, shpresojmë që në javën e ardhshme të hapim konkursin për pjesën tjetër të stafit. Menaxherët e njësive kanë filluar punën që nga data 5 për tre njësitë operative në veri, po ashtu edhe për impiantin në Zubin Potok", deklaroi ai për RTK.
Faturimi nuk do të aplikohet retroaktivisht, pasi së pari kërkohet regjistrimi i konsumatorëve dhe instalimi i matësve të ujit. "Jo, retroaktivisht nuk mundemi të kthehemi, sepse është proces që kërkon kohë. Fillimisht duhet stafi, evidentimi i konsumatorëve, regjistrimi, sepse nuk kemi as numër të saktë atje. Ka punë, por shpresojmë që orientimisht të fillojë diku nga mars – prill i vitit 2026", shtoi Kurti.
Një pjesë e banorëve në veri shprehen të gatshëm të paguajnë faturat, për sa kohë furnizimi me ujë mbetet i rregullt. "Do ta paguaj pse jo. Po, do të paguajmë. Tash kemi ujë, furnizimi me ujë është në rregull", tha një banor i veriut të Mitrovicës. "Vetëm le të ketë ujë, të gjitha të tjerat janë të mundshme. Do ta paguajmë pa problem. Patjetër do ta paguajmë, pse jo", deklaroi Slavko Mandiq, banor në veri të Mitrovicës.
Së fundmi, kompania ka nënshkruar kontratën e parë për faturim me Komunën e Mitrovicës së Veriut, hap ky që shihet si simbolik, por i rëndësishëm për shtrirjen e shërbimit. Qytetarët pritet të kryejnë obligimet si në komunat e tjera, pas shembullit të pagesës së rrymës që filloi para një viti.