Zyra Kombëtare e Auditimit (ZKA) publikoi raportin mbi pasqyrat financiare vjetore të Komunës së Mitrovicës së Veriut për vitin 2025, ku u identifikuan mangësi në menaxhimin e të hyrave komunale. Sipas gjetjeve, komuna ka humbur 25 mijë e 286 euro për shkak të moszbatimit të procedurave ligjore.
Një prej problemeve kryesore lidhet me lëshimin e një lejeje për një objekt banimi kolektiv me sipërfaqe 12 mijë e 580 metra katrorë. Për këtë rast, komuna arkëtoi 20 mijë e 883 euro, ndonëse tarifa e parashikuar ishte 38 mijë e 621 euro. Kjo diferencë prej 17 mijë e 738 eurosh u shkaktua nga pakujdesia administrative dhe mungesa e kontrolleve të brendshme.
Në të njëjtën kohë, Drejtoria e Urbanizmit nuk ka kërkuar leje mjedisore për të njëjtin projekt, vlera e të cilit ishte 3 milionë e 774 mijë e 180 euro. Si pasojë, komuna nuk arriti të arkëtojë taksën prej 7 mijë e 548 eurosh, e cila llogaritet si 0.2% e vlerës së investimit. ZKA vlerësoi se ky veprim dëmtoi buxhetin komunal dhe mund të ndikojë në mosrespektimin e standardeve për mbrojtjen e mjedisit.
Përkundër këtyre parregullsive në procedurat administrative, audituesit kanë dhënë opinion të pamodifikuar për pasqyrat financiare, duke vlerësuar se ato paraqesin një pamje të drejtë të gjendjes financiare. ZKA ka rekomanduar komunën të forcojë mekanizmat e kontrollit për të parandaluar humbje të ngjashme në të ardhmen.