Pas gati tri dekadash, praktika e konsumimit të ujit pa u faturuar në katër komunat me shumicë serbe – Mitrovicë e Veriut, Zveçan, Zubin Potok dhe Leposaviq – po shkon drejt fundit. Banorët e këtyre zonave pritet që gjatë këtij viti të integrohen në sistemin e rregullt të pagesave, duke shënuar një ndryshim thelbësor në menaxhimin e shërbimeve publike.
Sipas të dhënave nga Kompania Rajonale e Ujësjellësit (KRU) Mitrovica, mungesa e faturimit që nga viti 1999 ka rezultuar në detyrime të pambledhura që kapin shifrën prej 20 milionë eurosh. Vetëm gjatë periudhës 2016-2025, kostoja vjetore e ujit të shpenzuar ka variuar mesatarisht rreth 900 mijë euro në vit, ndërsa në disa periudha ka kaluar edhe mbi 1 milion euro. Kjo kosto është përballuar përmes subvencioneve nga buxheti i shtetit.
Kjo situatë është pasojë e funksionimit të zonës me struktura paralele dhe mungesës së kontrollit efektiv institucional në terren pas luftës së vitit 1999. Në përpjekje për të normalizuar këtë shërbim, KRU Mitrovica nënshkroi një marrëveshje në fillim të vitit të kaluar me kryetarët e atëhershëm të komunave përkatëse për nisjen e procesit të faturimit.
Ndonëse Autoriteti Rregullator për Shërbimet e Ujit (ARRU) kishte planifikuar që ky proces të fillonte në tremujorin e parë të vitit 2026, zbatimi i tij është përballur me vonesa, duke mbetur një prej çështjeve kryesore në agjendën e institucioneve për muajt në vijim.