Drejtori i KRU Mitrovica, Bashkim Kurti, deklaroi se shtrirja e shërbimeve në katër komunat veriore po zhvillohet sipas planifikimeve. Ky proces mbështetet në marrëveshjet e nënshkruara në janar të vitit 2025 me komunat Mitrovicë e Veriut, Zveçan, Zubin Potok dhe Leposaviq.
Sipas Kurti, vendosja e ujëmatësve për amvisëritë pritet të fillojë më 1 gusht, ndërsa arkëtimi i pagesave do të nisë zyrtarisht nga 1 tetori 2026 për të gjithë konsumatorët. Aktualisht, puna është përqendruar në fazën përfundimtare të furnizimit me ujëmatës, pas përmbylljes së procesit të tenderimit të mbështetur nga Ministria e Ekonomisë.
Përmirësimet dhe rekapitulimi i stafit
Për të përballuar këtë zgjerim, kompania ka forcuar kapacitetet njerëzore. Me rekrutimin e 115 punonjësve të rinj, numri i përgjithshëm i stafit të ndërmarrjes ka arritur në rreth 380 persona. Kurti theksoi se janë rritur të ardhurat e punonjësve për rreth 53 për qind, ndërsa janë siguruar edhe kushte shtesë, si sigurimi shëndetësor dhe rritja e shujtave ditore.
Procesi po realizohet me mbështetjen e Ministrisë së Ekonomisë, GIZ-it gjerman dhe Zyrës së Bashkimit Evropian. Drejtori i KRU Mitrovica konfirmoi se institucionet në Mitrovicën e Veriut dhe Zveçan i kanë pranuar faturat e para qysh në muajin maj, duke shënuar hapat e parë të normalizimit të këtij shërbimi në veri të vendit.