Një avion luftarak i tipit F-35B Lightning II, i cili i përkiste Korpusit të Marinës së Shteteve të Bashkuara, është rrëzuar në afërsi të Bazës Ajrore Miramar (MCAS Miramar) në San Diego, Kaliforni. Incidenti është konfirmuar nga autoritetet ushtarake, të cilat e kanë cilësuar rastin si një incident të Klasës A.
Sipas informacioneve të bëra publike, ngjarja ka ndodhur rreth orës 10:00 të mëngjesit sipas kohës lokale. Piloti i mjetit ka arritur të katapultohet në kohë dhe është shpëtuar nga ekipet e emergjencës që iu përgjigjën thirrjes menjëherë pas rrëzimit.
Pamjet e publikuara në mediat sociale dhe ato të transmetuara nga stacioni televiziv lokal KGTV tregojnë tym të dendur që ngrihet nga vendi ku avioni është përplasur. Ekipet zjarrfikëse kanë ndërhyrë në vendngjarje për të shuar flakët që përfshinë mbetjet e mjetit fluturues. Autoritetet bënë të ditur se detaje të tjera mbi shkaqet dhe rrethanat e incidentit do të bëhen të ditura në një njoftim të dytë, ndërsa hetimet për këtë rast janë në vijim.
Përditësime
Piloti i avionit ndodhet në një qendër mjekësore në gjendje të qëndrueshme, jashtë rrezikut për jetën. Shërbimi Zjarrfikës njoftoi se ekipet e emergjencës kanë shuar edhe flakët në zonën përreth, të shkaktuara nga rrëzimi i avionit F-35, i cili ka një vlerë prej 109 milionë dollarësh.
Zyrtarët e Korpusit të Marinës bënë të ditur se piloti i avionit F-35B, pjesë e Grupit 11 të Avionëve Detarë të Krahut të 3-të, u përfshi në një rrëzim në Bazën Ajrore Miramar. Kjo bazë strehon mbi 15 mijë marinsa, marinarë dhe punonjës civilë. Incidenti ka ngritur shqetësime lidhur me sigurinë ajrore në rajon, ku në vitin 2023 u regjistrua edhe rrëzimi i një avioni F/A-18 Hornet.