Në Shqipëri jetojnë rreth 27 mijë të huaj. Vitin e kaluar u bënë 19.321 aplikime për leje qëndrimi, nga të cilat 16.651 u miratuan, një pjesë janë ende në proces dhe 343 u refuzuan.
Më shumë se 13.300 aplikime ishin për punësim, ndërsa 2.583 për bashkim familjar. Shtetet me rritjen më të madhe të aplikimeve janë India, Nepali, Filipinet, Egjipti dhe Mianmar.
Punonjësit e huaj dominojnë në sektorët e industrisë së peshkimit, ndërtimit, fasonerisë dhe turizmit, ku mungon fuqia punëtore vendase. Qytetet me përqendrimin më të lartë janë Tirana, Durrësi dhe Vlora, ku në Vlorë punësohen 800 shtetas të huaj, numër që pritet të rritet me sezonin turistik.
Një punonjës indian në Vlorë shprehet: «Në muajin mars bëj dy vjet këtu. Jam i kënaqur. Kushtet e punës dhe pagesa që marr janë të kënaqshme».
Një filipinase thotë: «Punoj në sektorin e peshkimit. Jam me shoqe të tjera dhe kemi ardhur së bashku për të punuar në Vlorë. Është një vend që më pëlqen».
Një tjetër nga Filipinet shton: «Aktualisht ndodhem prej 9 muajsh në Shqipëri. Jam i kënaqur deri më tani. Të ardhmen e shikoj në Vlorë, ndaj kam vendosur të rri me familjen».
Sipërmarrja ka shpallur mbi 6 mijë vende pune të lira. Qeveria shqiptare negocion me shtete si Bangladesh, Filipinet, Indonezia dhe Mianmar për të sjellë fuqi punëtore të kualifikuar në sektorët me mungesa.