Administrata Tatimore e Kosovës (ATK) bëri të ditur se në dy muajt e parë të vitit 2026 janë mbledhur 206.9 milionë euro të hyra tatimore. Kjo shifër paraqet rritje prej 22.6 milionë eurosh, ose 12.2 për qind, krahasuar me periudhën e njëjtë të vitit të kaluar.
Sipas ATK-së, kjo rritje reflekton nivel më të lartë të përmbushjes së obligimeve nga tatimpaguesit, përmirësim të proceseve të administrimit fiskal, forcim të administrimit tatimor dhe zgjerim të bazës së tatimpaguesve që zbatojnë rregullisht detyrimet.
Autoriteti tatimor planifikon të konsolidojë trendin pozitiv përmes këtyre masave:
- Avancim i proceseve të punës;
- Rritje e përdorimit të teknologjisë në administrimin tatimor;
- Analizë më e thelluar e riskut;
- Intensifikim i aktiviteteve kundër ekonomisë joformale.
ATK rikujton tatimpaguesit se afati për dorëzimin e Deklarimit Vjetor të të Ardhurave është deri më 31 mars. Autoriteti u bën thirrje të përmbushin këtë obligim ligjor brenda afatit, duke shfrytëzuar shërbimet elektronike për një proces më të lehtë dhe efikas.