Gjykata e Apelit e Juridiksionit të Përgjithshëm në Tiranë përballet me rritje të dosjeve të prapambetura. Të dhënat për vitin 2025 tregojnë se numri i çështjeve në pritje kaloi nga 41.700 në 45.876, ndërmjet të cilave ka dosje që presin zgjidhje prej nëntë vitesh. Kjo ndodh tre vjet pas miratimit të hartës së re gjyqësore.
Të martën e 16 marsit, Bashkim Bulku, 75 vjeç, u paraqit në Gjykatën e Apelit në Tiranë për të mësuar se padia e tij për pronë ishte rishortuar te një gjyqtar tjetër. Ai, që ka 35 vjet në procese gjyqësore, tha: «E merr një Nastradin, e lë një Nastradin». «Kam 35 vjet unë, isha 40 vjeç kur e nisa, jam 75 tani. Këta presin që ne të vdesim, pastaj nuk ka kush kërkon pronat», shtoi ai.
Qytetarët si Bulku akuzojnë gjyqtarët për vonesa të qëllimshme dhe korrupsion. Gjyqtarët e Apelit ankohen për numër të madh dosjesh të prapambetura, mungesë stafi, mjedisesh dhe mbështetjeje.
Në analizën vjetore për 2025, Gjykata e Apelit pranon krizën: «Analiza tregon qartë se përpjekjet e vazhdueshme të gjyqtarëve, ndihmësve ligjorë, sekretarëve gjyqësorë dhe administratës mbështetëse, megjithëse të domosdoshme dhe të vlerësueshme, nuk janë të mjaftueshme për të përballuar në mënyrë strukturore këtë situatë, në mungesë të ndërhyrjeve institucionale të qëndrueshme».
Strategjia e Këshillit të Lartë Gjyqësor për uljen e prapambetjeve dhe harta e re gjyqësore konsiderohen të pamjaftueshme nga ekspertët. Avokatja Irena Dule vlerëson se KLGJ bën vetëm konstatime të problemeve, pa ofruar zgjidhje.