Në mbledhjen e Komisionit për Legjislacion të Kuvendit të Kosovës më 5 mars 2026, deputeti Adnan Rrustemi i Lëvizjes Vetëvendosje mbrojti idenë e presidentes Vjosa Osmani për dërgimin e amendamenteve kushtetuese në seancë plenare.
Rrustemi deklaroi se amendamentet do të dërgohen në seancë me vonesë, por vendimi përfundimtar u takon deputetëve. "Sot po i dërgojmë në seancë, me një rrethanë specifike, me vonesë dhe i mbetet deputetëve të votojnë ose jo", tha ai.
Sipas tij, komisionet parlamentare janë vetëm trupa ndihmëse dhe nuk duhet të mbajnë peng vullnetin e 120 deputetëve. "Komisionet janë trupa ndihmëse, nuk janë filtra të domosdoshëm. Ka mundur edhe të mos mbahet kjo mbledhje. Shumë mirë që po mbahet, por nuk janë filtra komisionet që nëse nuk kalon diçka aty të mbahet peng vullneti i 120 deputetëve. Në asnjë mënyrë. Ne këtu, 11 anëtarë, vetëm e ndihmojmë Kuvendin", u shpreh Rrustemi.
Amendamentet lidhen me propozimin për zgjedhjen e presidentit nga populli, i cili ka hasur vonesë prej 14 vitesh.