Ruben Saraiva, 31-vjeçar portugez i rritur në Londër, u dënua më 25 mars 2026 me burgim të përjetshëm nga gjyqtari Lirim Bulica në Gjykatën e Lezhës për vrasjen në bashkëpunim të Ardian Nikulajt. Vendimi u lexua të mërkurën në prani të bashkëshortes së viktimës, Rudina Nikulajt, dhe miqve të tij.
Rekrutuesit dhe paguesit e tij në Angli kanë vënë një shpërblim prej 500.000 eurosh për eliminimin e tij në burg. Kjo thirrje lidhet me frikën se Saraiva mund të kthehet në bashkëpunëtor drejtësie dhe të zbulojë identitetin e tyre. Informacioni erdhi në rrugë operative te Drejtorinë e Përgjithshme të Burgjeve dhe u mësua nga gazetari Muhamed Veliu i Top Channel.
Pas këtij informacioni, Saraiva u vendos në regjim strikt izolimi në paraburgimin 302 “Mine Peza”, larg të burgosurve të tjerë. Gjatë seancës gjyqësore, ai mbërriti i shoqëruar nga një skuadër e armatosur me armë gjysmëautomatike “Berreta” nga Operacionalja e Burgjeve.
Perimetri i gjykatës u rrethua nga 15 punonjës policie kriminale pa uniformë të Lezhës dhe 5 anëtarë të Forcave Shqiponja. Në sallë qëndruan 8 efektivë të armatosur të skuadrës operacionale, ndërsa Saraiva, i veshur me kostum të zi “Nike”, u mbajt në kafazin e gjykatës nga tre gardianë.
Ambasada e Portugalisë në Romë ka ndërmarrë veprime që nga ndalimi i tij, ndërsa Konsulli i Nderit në Tiranë ndoqi seancën e leximit të vendimit.