Përballë pasojave të valës së të nxehtit që ka përfshirë Europën, qeveria e Rumanisë ka ndërmarrë një operacion emergjent për të garantuar funksionimin e centralit bërthamor të Cernavodës. Ushtria rumune ka realizuar një shpërthim të kontrolluar në një degë të lumit Danub, rreth 50 kilometra larg centralit, pranë fshatit Izvoarele.
Qëllimi i këtij operacioni ishte largimi i një mase shkëmbore që ishte ekspozuar si pasojë e rënies së niveleve të ujit, duke penguar rrjedhën drejt sistemit të ftohjes së impiantit. Ministri i Përkohshëm i Mbrojtjes, Radu Miruță, konfirmoi suksesin e ndërhyrjes, duke theksuar se ajo do të lehtësojë furnizimin me ujë dhe do të përmirësojë lundrimin në lumë. Sipas deklaratave të ministrit, çdo ditë funksionimi e centralit është me vlerë të lartë për rrjetin energjetik rumun, i cili ka shpallur gjendjen e alarmit kombëtar deri më 31 gusht.
Operacioni, i cili kushtoi rreth 1.3 milionë euro, vjen pas paralajmërimeve se, nëse nivelet e ujit nuk do të rriteshin, centrali do të detyrohej të mbyllej plotësisht. Javën e kaluar, një prej dy reaktorëve kishte ndaluar punën për shkak të krizës së ujit. Aktualisht, Danubi transporton vetëm një të tretën e prurjes së tij mesatare sezonale. Autoritetet theksojnë se nuk ka rrezik për aksidente bërthamore, por situata mbetet delikate. Ministria e Energjisë është duke shqyrtuar masa shtesë, siç është kursimi i energjisë dhe kufizimi i prodhimit industrial, ndërkohë që vendi po rrit importet e energjisë nga Ukraina.