Deputeti i Partisë Demokratike për qarkun e Lushnjës, Saimir Korreshi, ka reaguar lidhur me situatën alarmante mjedisore në këtë qytet. Përmes një postimi në rrjetet sociale, ai ka denoncuar faktin se kanali vaditës që kalon përmes Lushnjës është bllokuar nga mbeturinat e ngurta dhe bidonët plastikë.
Sipas Korreshit, kjo situatë ka shkaktuar ndotje të konsiderueshme, e cila shoqërohet me erë të rëndë, prani të shtuar të mushkonjave dhe rrezik për përhapjen e infeksioneve. Në denoncimin e tij, deputeti demokrat ka kërkuar nga Bashkia e Lushnjës dhe qeveria që të marrin masa të menjëhershme për pastrimin e kanalit.
"Kur bidonat plastikë dhe mbeturinat pushtojnë dhe bllokojnë kanalin vaditës që kalon përmes Lushnjës, për banorët mund të ketë vetëm erë kërme, mushkonja dhe burim infeksioni", shkroi Korreshi. Në reagimin e tij, ai nuk i kurseu as tonet ironike ndaj institucioneve, duke u bërë thirrje që t’ua kthejnë qytetarëve taksat në shërbime, "gjithmonë nëse s’u prishin plazhin për ditë të dielë".