Ish-deputeti i Partisë Demokratike, Ervin Salianji, ishte i ftuar më 19 mars në emisionin Kjo Javë, ku foli për kandidimin e tij të pritshëm për kreun e partisë në zgjedhjet e brendshme të 23 majit.
Salianji deklaroi se në kushtet e opozitës njerëzit kanë frikë të vënë në dyshim autoritetin e liderit. Sipas tij, Sali Berisha nuk e bën dot PD-në fituese, edhe pse premtoi pas rikthimit se do ta mundë Edi Ramën.
Ai theksoi nevojën për krijimin e institucioneve për të shmangur autoritetin personal, duke thënë se natyra e njeriut është lakmitare dhe se duhet kultivuar kultura demokratike përmes akademive dhe figurave të rëndësishme. "Problemi është se debati bëhet për atë kush është më i forti apo kush vjedh më shumë", u shpreh Salianji, duke shtuar se Shqipëria duhet të kalojë në logjikën e demokratizimit të partive.
Salianji përmendi se kultura demokratike është dëmtuar dhe se liderët përcaktohen nga vota. Ai solli shembullin e Britanisë, ku kreu i Partisë Laburiste humbi tre herë zgjedhjet, ndërsa më pas erdhi Starmer. "Ka rregulla të qarta loje. Liderët nuk bëhen me hile apo lëpirje, siç bënte dikur Rama, por përmes përdorimit të institucioneve për jetën publike", deklaroi ai.
Ai tregoi se ka ngritur këtë debat në kryesinë e PD-së dhe ka pritur që të mos zhvendoset vëmendja deri në raportin e ODIHR-it. Sipas Salianjit, PD-ja demotivon votuesin duke thënë se me Ramën nuk votohet për shkak të vjedhjes së zgjedhjeve dhe se nëse humbet, duhet dorëzuar funksionin.