Samiti i Bashkimit Evropian me vendet e Ballkanit Perëndimor, i mbajtur në Tivat, përfundoi pa miratimin e një deklarate të përbashkët. Institucionet evropiane publikuan një komunikatë, në të cilën rikonfirmohet përkushtimi ndaj procesit të zgjerimit të bazuar në merita dhe theksohet rëndësia e marrëdhënieve të mira fqinjësore.
Gjatë samitit u prezantuan disa nisma për zhvillimin e rajonit:
• Forcimi i bashkëpunimit me Agjencinë e Bashkimit Evropian për Sigurinë Kibernetike.
• Nisja e një programi mobiliteti për 100 nëpunës civilë nga rajoni, në bashkëpunim me Shkollën Rajonale për Administratë Publike.
• Zgjerimi i programit DiscoverEU për të rinjtë 18-vjeçarë të rajonit, duke filluar nga viti 2027.
• Hapat për krijimin e marrëveshjeve të reja për roaming ndërmjet BE-së dhe Ballkanit Perëndimor.
Kryetarja e Komisionit Evropian, Ursula von der Leyen, deklaroi se procesi i zgjerimit duhet të jetë më i shpejtë dhe më i dukshëm për qytetarët. Ajo veçoi progresin e Shqipërisë dhe Malit të Zi, duke theksuar se këto vende po bëjnë punë të mirë drejt qëllimit të anëtarësimit. Nga ana tjetër, kryeministri i Shqipërisë, Edi Rama, kërkoi nga Bashkimi Evropian një qasje më të guximshme për të shndërruar momentin aktual politik në veprime konkrete.