Në Dhomat e Specializuara të Kosovës në Hagë u mbajt konferenca përgatitore e mbrojtjes në çështjen gjyqësore ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit. Ngjarja ndodhi më 1 prill 2026.
Të pranishëm përmes videolidhjes ishin Thaçi, Kilaj dhe Fazliu. Kuçi dhe Smakaj kanë hequr dorë nga e drejta për pjesëmarrje, çka gjyqtari i vetëm Christopher Gosnell e konfirmoi se lejohet sipas Rregullores së Procedurave dhe Provave.
Gjatë konferencës, palët parashtruan argumente në lidhje me dëshmitarët dhe datat e mundshme të seancave. Gosnell njoftoi se nuk do të ketë dëshmitar të paktën javën që fillon më 7 prill 2026. Ai udhëzoi palët të paraqiten më 14 dhe 15 prill për dëshminë e mundshme të dëshmitarit DHD 01, varësisht nga vendimi për kërkesën sipas rregullit 153.
"Duke marrë parasysh parashtrimet e dëgjuara sot dhe ato sipas rregullit 119, është e qartë se nuk ka dëshmitar për javën e ardhshme", tha Gosnell. Ai shtoi se gjykimi shtyhet për 14 prill.
Mbrojtja e Thaçit u urdhërua të dorëzojë kërkesat deri nesër në orën 16:00, duke qenë sa më konkrete për aspektet kohore të dëshmitarëve, kategorinë e tyre si ekspertë dhe disponueshmërinë brenda 30 ditëve.
Çështja lidhet me akuzat për pengim të drejtësisë. Prokuroria pretendon se të akuzuarit, gjatë vizitave në Hagë në 2023, u kanë dhënë udhëzime dhe informacione konfidenciale dëshmitarëve për gjykimin e krimeve të luftës. Të pandehurit janë deklaruar të pafajshëm. Thaçi akuzohet gjithashtu për krime lufte bashkë me Kadri Veselin, Rexhep Selimin dhe Jakup Krasniqin, për të cilët Zyra e Prokurorit të Specializuar kërkon nga 45 vjet burgim për secilin.