Seanca e radhës gjyqësore për rastin e sulmit në kanalin Ibër-Lepenc është caktuar për të hënën, në orën 13:15, në Pallatin e Drejtësisë në Prishtinë. Sulmi ndodhi më 29 nëntor 2024, në fshatin Varagë të komunës së Zubin-Potokut.
Sipas aktakuzës së Prokurorisë Speciale të Kosovës, tre të pandehurit akuzohen për mbajtje të paligjshme të armëve. Jovan Viqentijeviq dhe Dragisha Viqentijeviq përballen gjithashtu me akuza për cenim të rendit kushtetues përmes dëmtimit ose shkatërrimit të pajisjeve dhe instalimeve publike, kryerje të akteve terroriste dhe spiunazh.
Aktakuza ndaj të pandehurve u ngrit më 9 dhjetor 2025 nga Prokuroria Speciale. Sipas saj, të akuzuarit lidhen me sulmin, i cili shkaktoi dëme të konsiderueshme në kanalin Ibër-Lepenc, pjesë e infrastrukturës ujore dhe energjetike të Kosovës.