Guvernatori i Bankës së Shqipërisë, Gent Sejko, priti më 29 janar drejtoreshën e re ekzekutive të Autoritetit të Mbikëqyrjes Financiare (AMF), Adela Xhemali.
Gjatë takimit, Sejko prezantoi zhvillimet kryesore të ekonomisë shqiptare, duke u ndalur në ecurinë e aktivitetit ekonomik, situatën financiare dhe perspektivën e tyre afatmesme. Ai u ndal gjithashtu te masat dhe ndryshimet e fundit rregullatore në fushën e mbikëqyrjes bankare, të ndërmarra për të forcuar mbrojtjen e konsumatorit dhe për të rritur transparencën në marrëdhëniet ndërmjet institucioneve financiare dhe klientëve.
Palët diskutuan mbi ndërveprimin në rritje ndërmjet sektorit bankar dhe atij jobankar, në kushtet e krijimit dhe konsolidimit të grupeve financiare me veprimtari ndërsektoriale. U theksua nevoja për koordinim më të ngushtë mbikëqyrës dhe shkëmbim informacioni mbi metodologjitë statistikore, me qëllim identifikimin dhe adresimin në kohë të rreziqeve potenciale për stabilitetin financiar.
Në kuadër të procesit të integrimit evropian, palët nënvizuan rëndësinë e bashkëpunimit ndërinstitucional për përmbushjen e detyrimeve që rrjedhin nga negociatat për kapitujt e acquis communautaire. Në veçanti, u përmendën Kapitulli 9 "Shërbimet financiare", Kapitulli 4 "Lëvizja e lirë e kapitalit" dhe Kapitulli 17 "Politika ekonomike dhe monetare".
Sejko uroi Xhemalin për marrjen e detyrës së re dhe rikonfirmoi angazhimin e Bankës së Shqipërisë për një bashkëpunim të qëndrueshëm dhe efektiv me AMF-në, si dhe për mbështetjen e stabilitetit makroekonomik dhe financiar të vendit.