Scott Bessent, sekretari i Thesarit të Shteteve të Bashkuara, përforcoi mesazhin e presidentit Donald Trump se SHBA nuk kanë ndërmend të tërhiqen nga çështja e Groenlandës. Në një intervistë për NBC News të dielën, ai cilësoi Evropën si “shumë të dobët” për të siguruar vetë sigurinë e saj dhe theksoi se “evropianët transmetojnë dobësi, ndërsa SHBA-ja transmeton forcë”.
Të shtunën, Trump njoftoi vendosjen e tarifave 10% për produktet nga tetë vende evropiane, duke filluar nga 1 shkurti, me rritje në 25% në qershor nëse nuk arrihet marrëveshje për “blerjen e Groenlandës”. Bessent minimizoi kërcënimet e Bashkimit Evropian për anulimin e marrëveshjes tregtare të arritur vitin e kaluar, duke thënë se ajo nuk është finalizuar dhe se Trump përdor “fuqitë emergjente” si levë negociuese.
Ky zhvillim nxiti reagime të forta në Evropë. Presidenti francez Emmanuel Macron e quajti masën “të papranueshme” dhe deklaroi se do të kërkojë aktivizimin e mekanizmit më të fuqishëm të kundërmasave të BE-së.
Bessent paraqiti arsye gjeopolitike për pretendimin amerikan ndaj Groenlandës, duke përmendur konkurrencën në rritje në Arktik, planet për mburojën kundër-raketore “Golden Dome” (ose “Kupola e Artë”) dhe varësinë e mëparshme energjetike të Evropës nga Rusia, e cila sipas tij “financoi operacionet ruse kundër Ukrainës”. Ai hodhi poshtë shqetësimet se kjo mund të çojë në shpërbërjen e NATO-s, duke e cilësuar dilemën si “të rreme” dhe duke thënë se liderët evropianë do ta pranojnë nevojën për “ombrellën e sigurisë” amerikane.
“Presidenti beson se siguria e përforcuar nuk mund të ekzistojë pa qenë Groenlanda pjesë e Shteteve të Bashkuara”, përfundoi Bessent.