Prokuroria e Tiranës sekuestroi pak ditë më parë pasuri me vlerë 30 milionë euro në Dhërmi, që i përkasin shtetasit spanjoll Álvaro Romillo Castillo, i njohur si KriptoSpanja. Sekuestrimi përfshin rreth 23 hektarë tokë dhe lidhet me dyshimet për pastrim parash nga një skemë mashtrimi investimi.
Në hetim përfshihen gjithashtu babai i tij dhe partnerja. Sipas autoriteteve spanjolle dhe mediave të huaja, Romillo Castillo ka udhëhequr platformën Madeira Invest Club (MIC), e cila ka tërhequr fonde nga mijëra investitorë me premtime për kthime të larta dhe të qëndrueshme. Vlera totale e mashtrimit vlerësohet të tejkalojë 250 milionë euro, me mbi 3.000 palë të prekura, kryesisht të përfaqësuara nga firma Zaballos Abogados.
Hetimi spanjoll përshkruan skemën si të ngjashme me një piramidë financiare, ku pagesat për investitorët e vjetër mbështeteshin nga kontributet e pjesëmarrësve të rinj, pa aktivitet të vërtetë investimi. Në dhjetor 2025, gjyqtari hetues i Gjykatës Kombëtare të Spanjës lëshoi aktakuzë kundër Romillos dhe bashkëpunëtorëve për mashtrim të rënduar, organizatë kriminale dhe pastrim parash, duke vendosur garanci prej disa milionë eurosh për detyrime civile.