Prokuroria Themelore në Prizren, në bashkëpunim me Policinë e Kosovës, Doganën dhe Administratën Tatimore të Kosovës, ka sekuestruar mbi 8 kilogramë ari dhe argjend të padeklaruar me vlerë mbi 460 mijë euro.
Aksioni u realizua më 20 maj 2026 pas hetimeve që kishin filluar që nga 19 shtatori 2025. Kontrollet u kryen në gjashtë lokale afariste dhe tri shtëpi banimi në qytetin e Prizrenit.
Nga kontrollet u sekuestruan 3.775,33 gram ari i padeklaruar me vlerë rreth 455 mijë euro dhe 4.204,98 gram argjend i padeklaruar me vlerë rreth 8.900 euro. Hetimet janë iniciuar ndaj katër personave për veprat penale të shmangies nga tatimi dhe nga pagesa e tarifave doganore.
Gjatë aksionit u gjetën dhe u sekuestruan edhe dy armë pa leje. Ndaj personave të përfshirë është ngritur edhe një rast i veçantë për mbajtje të paautorizuar të armëve. Hetimet për rastin vazhdojnë.
Përditësime
Policia identifikoi katër të dyshuar – një femër dhe tre meshkuj kosovarë. Ata u shoqëruan në stacionin policor për intervistë. Rasti po procedohet sipas procedurës së rregullt në koordinim me Njësinë Rajonale për Hetimin e Krimeve Ekonomike dhe Korrupsionit në Prizren.