Prokuroria Themelore në Prizren ka ngritur aktakuzë ndaj katër të pandehurve, të cilët dyshohen për kryerjen e veprës penale të grabitjes në bashkëkryerje. Ngjarja ka ndodhur më 3 shkurt 2026, rreth orës 01:05, në afërsi të Tregut të Gjelbër në Prizren.
Sipas hetimeve, të pandehurit, të maskuar dhe të armatosur me armë zjarri e thikë, i janë afruar një automjeti në të cilin ndodheshin të dëmtuarit, L.R. dhe H.S. Nën kërcënim, ata kanë kërkuar para, duke përvetësuar të holla të gatshme nga L.R. si dhe një send me vlerë të vogël nga automjeti. Pas aktit, të dyshuarit janë larguar nga vendi i ngjarjes.
Policia e Kosovës, gjatë operacioneve të kontrollit, ka sekuestruar provat materiale që dyshohet se janë përdorur në këtë vepër penale:
• Një pistoletë e tipit “Zoraki” kalibër 9 mm me karikator dhe fishek.
• Një pistoletë e tipit “EKOL” kalibër 9 mm me karikator.
• Një automjet i markës “Golf VII”, që dyshohet se është shfrytëzuar për transportin e të dyshuarve.
Prokurori i çështjes i ka propozuar Gjykatës Themelore në Prizren që, pas administrimit të provave gjatë shqyrtimit gjyqësor, të pandehurit të shpallen fajtorë dhe të dënohen në përputhje me dispozitat ligjore në fuqi.