Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Sarandë, u vendos sekuestro preventive për sipërfaqen me përmasa 22.9 m x 13.4 m x 3.5 m, e ndërtuar mbi tarracën e Hotel Oasis, 6 kate, në lagjen nr. 1 të Bashkisë Sarandë. Kjo sipërfaqe është në pronësi të shtetasit Alqi Papa (A.P.).
Hetimet zhvillohen në kuadër të procedimit penal nr. 116 të vitit 2026, të regjistruar për veprat penale "Ndërtimi i paligjshëm për qëllime fitimi", parashikuar nga neni 199/a/4 i Kodit Penal, dhe "Shpërdorimi i detyrës", nga neni 248. Nga shqyrtimi i punimeve në terren rezulton krijimi i një volumi të ri ndërtimor funksional mbi objektin ekzistues.
Punimet përfshijnë:
- ngritjen e strukturës metalike mbajtëse;
- realizimin e mbulimit dhe soletës me llamarinë të valëzuar dhe shtresë betoni;
- ndarjen e ambienteve të brendshme;
- përfundimin e fasadës dhe vendosjen e vetratave.
Këto veprime u kryen gradualisht, të paktën nga periudha para datës 12.05.2025 deri më 31.03.2026, kur inspektimi i ekspertit konstaton fazë të avancuar përfundimi, përfshirë fasadën e jashtme dhe vetratat ballore.
Sipas njoftimit të Prokurorisë, pavarësisht regjistrimit të pasurisë si truall në certifikatën e pronësisë, objekti ekzistues, bazuar në vendimin e legalizimit, është i tipit social-ekonomik (shërbim). Punimet e reja lidhen funksionalisht me këtë destinacion dhe konsumojnë elementët e veprës penale të ndërtimit pa leje për qëllime fitimi.
Masa e sigurimit pasuror është parashikuar nga neni 274 i Kodit të Procedurës Penale.
Përditësime
Agjencia e Administrimit të Pasurive të Sekuestruara dhe të Konfiskuara dhe Agjencia e Mbikëqyrjes Policore ekzekutuan vendimin gjyqësor të datës 12 maj 2026 për sekuestrimin e sipërfaqes pa leje mbi tarracën e Hotelit Oasis, rrugë Butrinti, Sarandë. Prokurorja Silvana Belishta konfirmoi operacionin. Pamje nga droni tregojnë zonën e sekuestruar.